20190823 A Consellería de Mar vén de ofrecer unha serie de cifras sobre a actividade xerada pola súa campaña para frear o furtivismo nas praias, máis polo miúdo o relacionado co período vacacional, unha campaña que abrangue un bo número de areais a comarca de Barbanza, tal e como sinalamos hai uns días . Segundo informou o Servizo de Gardacostas de Galicia, realizáronse o mes pasado 150 inspeccións a pé de praia, detectándose un total de 67 infraccións. As cifras, que supoñen un incremento de arredor do 75% respecto a xullo do ano pasado, responden ao reforzamento dos controis e seguimentos levados a cabo polo dito servizo.
Un reforzamento que levou a campaña Non sexas pirata! até 45 areais e 35 concellos, fronte ás 35 praias e 21 concellos visitados o ano pasado. Estas accións comezaron a mediados de xullo e desenvólvense até que remate este mes de agosto percorrendo distintas localidades das tres provincias costeiras galegas. Entre os areais incluídos na iniciativa de divulgación e disuasión atópanse o Castro-Catía e Coroso, en Ribeira; O Areal na Pobra; Barraña e Carragueiros, en Boiro. Tamén se están a facer accións de sensibilización en Boa Grande, en Noia, e en San Francisco e Parameán, en Muros.
