20190822. A Asociación Cultural Corrubedo XI Séculos celebrará o domingo 25 unha gran festa conmemorativa. Na carpa instalada na explanada portuaria desta parroquia ribeirense, os asistentes poderán desfrutar dun xantar de confraternidade no cal se poderá degustar paella e outros manxares típicos da zona.
Para asistir tan só é preciso retirar un billete anticipado que se pode adquirir en diversos puntos de Corrubedo. Ademais, procederase á proxección do vídeo que, de xeito altruísta, realizou Maxi Franco. A continuación, darase paso á actuación da banda de gaitas e danza Tahúme que ofrecerán pezas tradicionais mesturando son e baile.
Así mesmo, durante a xornada farase a entrega dos agasallos que brindará a directiva da Asociación a tódolos colaboradores oficiais dos eventos que se realizaron ao longo do ano.
Finalmente, DJ Magic Mendes será o encargado de amenizar o remate desta cita.
