SumaRibeira vén de emitir un comunicado para reclamar aos concelleiros de Medio Ambiente e de Mobilidade do Concello de Ribeira a limpeza do camiño que vai dende o remate da pista asfaltada do Sego até o río Sanchanás, na parroquia de Artes, pois “nestes momentos atópase nun estado de importante abandono, malia ser un paseo transitado con frecuencia por veciños e veciñas, sobre todo con bo tempo”, explica a agrupación.
SumaRibeira, a través do seu concelleiro Xurxo Ferrón, presentou un escrito ao Concello para “que acometan con urxencia estes traballos de acondicionamento”, pois, explica, “non é de recibo que dous anos despois de ter intervido ese espazo para que puidera ser utilizado de enlace peonil pola beira do río, estea cuberto de herba e maleza, o que dificulta o seu uso, nomeadamente ás persoas que pola sua condición física teñen dificultade de movemento”.
A iniciativa, explica Xurxo Ferròn, foi ben acollida polo equipo de Goberno, que se comprometeu a acometer os traballos necesarios “á maior brevidade”.
