O Concello de Noia informou da realización estes días dunha serie de traballos de mellora e posta a punto nas instalacións de abastecemento municipal de auga, a ETAP. Segundo explicou o Goberno local, procedeuse a optimizar o sistema de potabilizado, á limpeza de filtros, ao pintado exterior das bombas e ao pintado interior das instalacións.
Ademais, o Concello fixo saber que ao longo dos vindeiros meses desenvolveranse máis melloras nesta infraestrutura, faranse a través dun convenio coa Consellería de Infraestructuras e Augas de Galicia por valor de 900.000 euros. Este acordo permitirá, entre outras cousas, a mellora definitiva do potabilizado e corrixir problemas de turbidez na auga.
De xeito complementario estase levando a cabo a adquisición de terreos lindeiros para a ampliación da ETAP.
