A sección sexta da Audiencia Provincial da Coruña, con sede en Santiago, condenou a tres anos e cinco meses de cárcere a un acusado de abusar sexualmente no termo municipal de Ribeira dunha amiga da súa filla, de forma continuada, e da nai da menor, nunha ocasión. O tribunal destaca que a proba analizada “pon de manifesto que os feitos denunciado pola vítima e a súa nai son certos”. Así, indica que o testemuño das afectadas é “coherente e persistente” e que, ademais, está corroborado “polas declaracións das testemuñas e polo informe pericial, que demostran que os feitos ocorreron no modo descrito polas prexudicadas”.
Os xuíces consideran acreditado que o condenado “de forma reiterada, aproveitaba os momentos en que podía estar a soas coa amiga da súa filla para tocala con ánimo de atentar contra a súa liberdade sexual”. A Sala tivo en conta a atenuante de dilacións indebidas “debido ás paralizacións habidas na fase de instrución”.
