O Concello de Boiro fixo balance da actividade xerada polo seu programa destinado a mellorar as posibilidades da cidadanía para atopar un posto de traballo. Trátase do programa Boiro Emprega, que, segundo informa o Goberno local, acadou até o de agora unha porcentaxe de inserción do 52%, sendo o sector da industria conserveira o que aglutina a maior parte das contratacións.
No programa, engade o Concello, participan 100 persoas desempregadas, realizando un plan formativo e de orientación laboral en función dos seus intereses. A aprendizaxe realizada ata o momento consistiu en obter os coñecementos e competencias transversais para a procura de emprego, como son o carné de manipulador de alimentos, o manexo de carretillas elevadoras, a prevención de riscos laborais, así como competencias dixitais básicas como marketing dixital, entre outros.
O último curso que concluíu foi o de carretillas elevadoras, que os participantes suman á formación de envasado en cadea e básico empregado de produción, o que achega ao alumnado “unha capacitación profesional completa para incorporarse á industria conserveira, de conxelados e precociñados, almacéns de frío, grandes distribuidores…”, explica o Concello de Boiro, lembrando que esta semana comeza a actividade formativa Certificado de Profesionalidade de Operacións Básicas de Cociña, que vai ter unha duración total de 350 horas e que inclúe prácticas en empresas da comarca.
Como dixemos, o obxectivo de Boiro Emprega é a formación para o emprego e fomentar a inserción laboral nos principais sectores produtivos da comarca para promover a contratación local.
