Catro anos de prisión e unha multa de 3.000 euros é a pena que solicita o Ministerio Fiscal para un veciño de Ribeira que a próxima semana sentará no banco dos acusados da sección sexta da Audiencia Provincial, para responder como suposto autor dun delito contra a saúde pública.
Os feitos que se lle imputan tiveron lugar o 10 de maio do 2018 cando foi sorprendido por efectivos da Policía Nacional na rúa Cristóbal Colón de Ribeira cando presuntamente pretendía vender estupefacientes.
Durante o rexistro atopóuselle unha bolsa con 27 papelinas de heroína, cun peso neto de 3,8 gramos. A droga segundo a policia ía destinada á súa venda a terceiros e podería alcanzar no mercado un valor de preto de 1.150 euros.
