20190722. Mulleres en Acción desenvolve a campaña Rede Lila, unha iniciativa de acompañamento de mulleres que funciona ao longo da Festa da Dorna en Ribeira. Desde a asociación feminista indican que pretenden así contribuír a unhas celebracións libres de violencia machista.
A Rede Lila atópase vertebrada por mulleres voluntarias, facilmente identificables porque van provistas dun distintivo morado, brazalete ou diadema, que leva a inscrición ‘PUNTO LILA’. Ademais, non hai localización concreta, pois as voluntarias están en distintos lugares da festa para que, calquera muller que sufra unha agresión machista ou calquera persoa que a presencie, poda poñerse en contacto con elas e pedir axuda. No caso de non haber ningunha preto, tamén se pode contactar por teléfono, chamando ou enviando unha mensaxe de WhatsApp ao 609351063.
Segundo Mulleres en Acción, esta iniciativa ten unha posible función disuasoria e “pensamos que esta acción contribúe a crear consciencia acerca da importancia da sororidade para desfrutar das festas en pé de igualdade, sen medo e coa seguridade de que vai haber alguén a quen acudir no caso de sentíreste atacada.” Así mesmo, expresan o seu agradecemento pola resposta da mocidade ribeirense, xa que apuntan que foron numerosas as mozas que se ofreceron para colaborar nesta acción, resultando “moi gratificante para nós ver este grao de implicación na xente nova”; e tamén ás mozas das peñas dorneiras pola súa implicación
