20190719. O Concello de Rianxo acolleu, ás 20.00 horas de onte, o pleno de organización no que se nomeou á socialista María del Carmen Figueira Ares, primeira tenente de alcalde, e ao nacionalista Tobías Betanzos Rego, segundo tenente. Tamén se aprobou a dedicación exclusiva do alcalde, Adolfo Muíños Sánchez, cunha retribución de 45.000 euros brutos anuais distribuídos en catorce pagas; a dedicación exclusiva da concelleira delegada de Urbanismo, ARI, Desenvolvemento Local, Comercio e Emprego, María del Carmen Figueira Ares, cun soldo de 39.000 euros brutos anuais; e as dedicacións parciais dos concelleiros delegados de Benestar Social, Igualdade e Diversidade, Hadriana Ordóñez Otero, de Deportes, Xusto Xosé Ordóñez Figueira, e de Educación e Normalización, Adelina Ces Quintáns, todos eles cunha paga de 13.000 euros brutos anuais.
Por outra banda, estableceuse a cantidade de 210 euros por asistencia a Xunta de Goberno Local, dos concelleiros membros desta, excepto que perciban dedicación exclusiva ou parcial; 100 euros por asistencia ás comisións informativas dos edís que non teñan dedicación exclusiva ou parcial; e 105 euros por asistencia aos plenos municipais dos concelleiros que non teñan dedicación exclusiva ou parcial.
Así mesmo, os grupos políticos municipais terán dereito a unha dotación económica de 100 euros mensuais, á que deberá engadírselle outra cantidade de 35 euros mensuais multiplicada polo número de membros que o integran.
Ademais, as comisións informativas estarán conformadas por 3 representantes do BNG, 2 do PSdeG-PSOE, 2 do PP, 1 de Rianxo en Común e 1 de Ciudadanos.
Finalmente, aprobouse a periodicidade mensual dos plenos, celebrándose o último xoves de cada mes agás agosto.
