A Xunta destaca en Porto do Son o labor das redeiras galegas na posta en marcha da súa estratexia de dinamización. O director xeral de Loita contra a Violencia de Xénero, Roberto Barba, participou na presentación oficial dun documento deseñado para avaliar a realidade do sector e impulsar medidas que garantan o seu futuro.
O director xeral de Loita contra a Violencia de Xénero, Roberto Barba, participou este sábado en Porto do Son na presentación oficial da Estratexia de dinamización das redeiras de Galicia, un acto no que quixo agradecer expresamente o empeño e o esforzo da asociación autonómica do colectivo para sacar adiante esta folla de ruta.
O documento nace co propósito de realizar un diagnóstico detallado da situación actual destas profesionais do mar e articular diversas liñas de actuación que contribúan a mellorar as súas condicións e reforzar a súa proxección de futuro.
Durante a súa intervención, o representante autonómico puxo en valor este proxecto como un exemplo do compromiso do tecido asociativo galego coa igualdade de xénero e a promoción do talento feminino. Así mesmo, Roberto Barba subliñou a importancia de manter a colaboración interinstitucional para continuar apoiando e impulsando iniciativas que fortalezan o papel das mulleres nos sectores estratéxicos de Galicia.
