O alumnado do Obradoiro de Emprego Tahume XI segue formándose no ámbito forestal e de carpintaría e aplicando os seus coñecementos en varios puntos dos municipios de Ribeira e O Porto do Son.
Na especialidade de forestal atópanse afondando na técnica do resinado nos montes de Baroña, onde xa levan varias semanas aprendendo e poñendo en práctica técnicas tradicionais vinculadas á xestión e ao aproveitamento dos recursos forestais; todo isto coa colaboración da comunidade de montes do lugar.
En canto a carpintaría, avanzan na reparación da pasarela do madeira do Carreiro, na parroquia de Aguiño. Esta intervención estará completada en vindeiras datas para o desfrute por parte dos veciños e veciñas.
Con relación a todo isto, a concelleira ribeirense de Promoción, Económica, Carmen Pérez, declara que “as persoas participantes neste obradoiro de emprego continúa formándose para mellorar a súas opcións de empregabilidade en dous nichos de mercado que demandan traballadores. E os coñecementos adquiridos nas clases lévanse á práctica en espazos públicos, polo que ten un impacto positivo no conxunto da sociedade”.
Formación teórica e práctica
Este programa botou a andar no pasado mes de xuño cun total de 20 persoas participantes e combina formación teórica e práctica. O obxectivo é a mellora da empregabilidade das persoas dos concellos de Ribeira e O Porto do Son, onde o alumnado recibe formación no ámbito profesional de forestal e de produción de carpintería e moble. Durante nove meses asisten ás especialidades de Aplicación de vernices e lacas en elementos de carpintería e moble; Actividades auxiliares en aproveitamentos forestais; Actividades auxiliares en conservación e mellora de montes; e Traballos de carpintería e moble.
A maiores da formación específica de carpintería e forestal, o alumnado recibe formación en competencias dixitais, igualdade, medio ambiente, orientación laboral ou autoemprego, entre outras.
O dito obradoiro conta co apoio da Consellería de Emprego Comercio e Emigración, que aporta unha achega de 546.552 euros para esta iniciativa de emprego
