Os feitos aconteceron o pasado mes de setembro durante as Festas da Mercé no barrio compostelán.
Axentes da Policía Nacional adscritos á Unidade de Delincuencia Especializada e Violenta (UDEV) de Santiago de Compostela detiveron catro menores de idade pola súa presunta implicación nunha violenta liorta ocorrida o pasado mes de setembro, no marco das celebracións das Festas da Mercé no barrio de Conxo.
Segundo informaron fontes policiais, durante os festexos un mozo resultou agredido por varias persoas, sufrindo lesións de diversa gravidade, entre as que se inclúen feridas provocadas por arma branca.
As pescudas desenvolvidas polos axentes da UDEV permitiron identificar os catro supostos agresores, todos eles menores de idade, que xa foron postos baixo custodia policial. Ás catro persoas detidas impútanselles delitos de lesións, ameazas e rifa tumultuaria. As dilixencias policiais foron remitidas á Fiscalía de Menores da Coruña.
A Comisaría de Santiago destacou que este operativo forma parte do traballo continuo de esclarecemento de delitos que desenvolve o Grupo de Delincuencia Especializada e Violenta, orientado a garantir a seguridade cidadá e previr episodios violentos tanto na vía pública como en eventos con grande afluencia de público.
