A veciñanza de máis de 65 anos compartiu unha xornada de confraternidade no polideportivo municipal amenizada polo grupo Élite
Os maiores do concello de Outes foron os grandes protagonistas desta xornada de sábado coa celebración da súa festa anual, un evento organizado polo Concello para render homenaxe á veciñanza de máis de 65 anos e que reuniu a máis de 800 persoas.
Os actos deron comezo cunha misa oficiada conxuntamente polos párrocos Roberto e Johan. A continuación, a comitiva trasladouse ata as instalacións do polideportivo municipal, espazo onde tivo lugar o concorrido xantar de confraternidade. A animación musical do encontro correu a cargo do grupo Élite, que puxo a nota festiva a un día deseñado especificamente para fomentar o reencontro, o lecer e o intercambio de lembranzas e anécdotas compartidas entre veciños de distintas parroquias.
Desde o Concello de Outes quixeron agradecer publicamente a «alta participación da veciñanza neste encontro, que pretende ser un recoñecemento público a unha vida de esforzo e traballo á veciñanza da vila que forman parte da memoria e da historia da nosa vila». Coa consolidación desta cita, o goberno local cumpre un ano máis o obxectivo de ofrecer un espazo comunitario de convivencia e agradecemento a toda unha xeración.
