O Concello de Porto do Son celebrará o vindeiro domingo 20 de decembro unha nova edición da carreira popular Sin-Son 10K, unha cita que reunirá a deportistas nun percorrido de 10 quilómetros entre Portosín e Porto do Son e que está incluída no calendario oficial da Federación Galega de Atletismo.
A saída da proba absoluta está prevista para as 11:00 horas desde Portosín, con chegada ao Porto do Son. O circuíto constará dun primeiro tramo urbano de 3,55 quilómetros en Portosín con outros 6,45 quilómetros pola estrada AC-550 ata alcanzar a meta, situada na zona portuaria de Porto do Son.
O prazo de inscrición comezará o venres 23 de outubro e permanecerá aberto ata o domingo 13 de decembro ás 23:59 horas, ou ata completar o máximo de 1.500 participantes. O prezo será de 10 euros por persoa ata o 29 de novembro e de 12 euros desde o 30 de novembro ata o peche do prazo. As inscricións realizaranse a través da web oficial da carreira.
A organización habilitará diferentes opcións para a recollida de dorsais e chips, tanto nos días previos como na propia xornada da proba. Ademais, os participantes disporán dun servizo de autobuses para trasladar os participantes desde Porto do Son ata Portosín, lugar de saída da proba.
Premios, servizos e atención aos corredores
A Sin-Son 10K repartirá premios en metálico para os cinco primeiros postos da clasificación xeral: 500 euros para o primeiro clasificado, 400 euros para o segundo, 300 euros para o terceiro, 200 euros para o cuarto e 100 euros para o quinto.
Así mesmo, haberá premios específicos para os tres primeiros corredores locais, tanto homes como mulleres, que cumpran os requisitos establecidos no regulamento. Todas as persoas inscritas recibirán unha camiseta técnica e disporán de avituallamento, servizo de gardarroupa, duchas, zonas de estacionamento e asistencia sanitaria. A proba contará co control técnico do Comité Galego de Xuíces da Federación Galega de Atletismo e con medidas de organización e seguridade ao longo do percorrido.
As carreiras escolares, protagonistas o sábado 19
A programación deportiva comezará o sábado 19 de decembro coas carreiras escolares en Portosín, con saída e meta na zona portuaria a partir das 17:00 horas, e estarán dirixidas a diferentes grupos de idade, desde a categoría chupete ata a sub-16, con distancias adaptadas a cada participante. A inscrición será gratuíta e estará aberta ata o 13 de decembro ás 23:59 horas, ou ata completar as 500 prazas dispoñibles.
Máis información e inscricións nas páxinas web da proba Sin-Son 10k e do Concello do Son.
