Este mércores 30 de setembro, a xornalista e escritora Nieves Concostrina estará no Liceo de Noia para conservar sobre a súa obra, os seus libros e a súa traxectoria na radio. Estará acompañada polo alcalde, Francisco Pérez Caamaño, e por José M. Romarís. A conversa dará comezo ás 20.30 horas no Liceo. A entrada será de balde. As entradas poderán recollerse no Concello o mesmo día en horario de mañá (de 11:30 a 13:30 h) e de tarde (de 18:30 a 20:20 h). Poderanse retirar un máximo de dúas entradas por persoa.
Nieves Concostrina Villarreal é unha recoñecida xornalista, escritora e divulgadora histórica española (nada en Madrid o 1 de agosto de 1961).
Formouse en Ciencias da Información na Universidade Complutense de Madrid e traballou no desaparecido Diario 16 entre 1981 e 1997. Máis tarde colaborou en televisión con Antena 3 e Vía Digital. Tamén dirixe a revista especializada Adiós Cultural e escribe columnas de opinión para medios dixitais.
O seu grande éxito chegou a través da radio, onde achega a historia ao público cun ton divertido e familiar. O seu espazo diario máis popular é Acontece que no es poco, emitido dentro do programa La Ventana da Cadena Ser.
Entre os seus libros máis vendidos atópanse Menudas historias de la historia, Polvo eres, Se armó la de San Quintín, Cualquier tiempo pasado fue anterior e a súa novela Pretérito imperfecto.
O seu labor de comunicación e divulgación foi recoñecida con importantes distincións en España, entre as que destacan o prestixioso Premio Ondas (2016) e o Premio Micrófono de Oro (2010).
