O Executivo local desmente ao PP sobre a perda dunha axuda de 160.000 euros, cuxa execución se viu trabada polo atraso nos permisos de Patrimonio para unha obra que supera os 700.000 euros.
O Goberno municipal de Padrón saíu ao paso das declaracións realizadas polo portavoz local do Partido Popular, Ángel Rodríguez Conde, en relación coa xestión dos fondos para a reforma da Praza de Abastos. Desde o Executivo local cualificaron de «falsas» e «simplistas» as críticas dos populares e aclararon que as dificultades para materializar os traballos derivan directamente das demoras administrativas da Xunta de Galicia na emisión de autorizacións sectoriais imprescindibles, concretamente da Dirección Xeral de Patrimonio.
Fontes municipais explicaron que o Concello solicitou e acadou dita subvención, pero lembran que a rehabilitación integral do mercado municipal é unha intervención de gran calado tras anos de abandono e falta de mantemento orixinados baixo anteriores mandatos do PP. O orzamento global estimado para intervir sobre o conxunto das naves supera os 700.000 euros, polo que a achega autonómica de 160.000 euros nin sequera cubría a metade do custo previsto para a primeira fase. Segundo argumenta o Goberno de Padrón, o atraso de meses por parte de Patrimonio á hora de autorizar as obras complicou o cumprimento dos estritos prazos esixidos pola convocatoria, un escenario que xa afectou a outros concellos galegos en exercicios anteriores.
Bloqueo en vivenda pública e marxinación nas novas residencias
Alén da Praza de Abastos, o Executivo padronés quixo rebater as acusacións de «falta de iniciativa» botando luz sobre a ausencia de interlocución coa administración autonómica noutras materias estratéxicas. Neste sentido, revelaron que o Concello leva agardando desde febreiro de 2026 —máis de sete meses— por unha reunión solicitada formalmente coa Consellería de Vivenda para abordar a creación de vivenda pública e accesible, petición que ata o de agora non obtivo ningunha resposta.
A esta situación súmase o recente anuncio da Xunta sobre a posta en marcha dun plan con 25 novas residencias de maiores, das cales 23 se construirán en municipios gobernados polo Partido Popular. O Goberno de Padrón esixiu explicacións públicas sobre os criterios empregados para este reparto e denunciou que o municipio volve quedar excluído a pesar de non contar aínda cunha residencia pública nin cun centro de día.
«Non se pide un trato de favor, pídese igualdade de trato, transparencia e colaboración entre administracións», subliñaron desde a Casa do Concello, advertindo de que as trabas políticas e institucionais «non as paga ningún partido, senón a veciñanza de Padrón».
