O alumnado do certificado de profesionalidade de Forestal do Obradoiro de Emprego Tahume XI, impulsado polos Concellos do Porto do Son e Ribeira, está a desenvolver un intenso programa de traballos prácticos en diferentes parroquias dos dous termos.
As actuacións no municipio sonense céntranse principalmente na limpeza, acondicionamento e mellora de espazos públicos e permiten ao alumnado aplicar sobre o terreo os coñecementos adquiridos durante a súa formación, ao tempo que contribúen directamente á conservación e posta en valor de diferentes zonas do municipio
Entre as intervencións realizadas destaca a limpeza e acondicionamento do parque do Outón, unha actuación que permitiu mellorar o estado deste espazo e favorecer ao seu uso e goce por parte da veciñanza.
Este programa botou a andar no pasado mes de xuño cun total de 20 persoas participantes e combina formación teórica e práctica. O obxectivo é a mellora da empregabilidade das persoas dos dous concellos, onde o alumnado recibe formación no ámbito profesional de forestal e de produción de carpintería e móbel.
Durante nove meses asisten ás especialidades de Aplicación de vernices e lacas en elementos de carpintería e moble; Actividades auxiliares en aproveitamentos forestais; Actividades auxiliares en conservación e mellora de montes; e Traballos de carpintería e moble.
A maiores da formación específica de carpintería e forestal, o alumnado recibe formación en competencias dixitais, igualdade, medio ambiente, orientación laboral ou autoemprego, entre outras.
O dito obradoiro conta co apoio da Consellería de Emprego Comercio e Emigración, que aporta unha achega de 546.552 euros para esta
iniciativa de emprego.
