Coincidindo coas obras de renovación das beirarrúas e do empedrado da rúa Galicia, o Concello de Noia decidiu aproveitar os traballos acometidos no firme para substituír tamén un tramo da tubaxe de saneamento que arrastraba unha avaría desde hai varios anos, segundo confirmaron fontes do Consistorio. Dende o Concello tamén explicaron que “é fundamental, cando se levanta unha rúa para renovala, mellorar servizos soterrados, co fin de evitar que máis adiante haxa que volver rompela por unha posíbel tubaxe en mal estado”. Dende o Goberno local engaden que neste caso ” actuación resulta especialmente complexa, xa que a rede de saneamento discorre nalgúns puntos a máis de catro metros de profundidade, o que dificulta de xeito considerábel os traballos”.
Engaden que a renovación da rúa Galicia “permitirá mellorar tanto o seu aspecto e accesibilidade como unha infraestrutura básica para o seu correcto funcionamento”.
Renovación da rúa
O Concello de Noia iniciou este mes de setembro as obras de renovación da beirarrúa da rúa Galicia, no tramo comprendido entre os números 2 e 12, cun investimento de 48.380,64 euros, IVE incluído. A actuación está financiada integramente a través do Plan Único da Deputación da Coruña e conta cun prazo de execución de tres meses.
Segundo explicou o Concello, a intervención “permitirá renovar unha beirarrúa que presenta deterioro e deficiencias de accesibilidade nun punto especialmente transitado da vila, que funciona como conexión entre a Alameda, o ensanche e o centro histórico”.
Os traballos inclúen a retirada do pavimento existente e a execución dun novo pavimento continuo de pedra granítica, así como a mellora dos alcorques e a incorporación de novos elementos de protección, buscando unha maior integración de todo o espazo.
A obra dá continuidade ás actuacións que o Concello vén desenvolvendo nesta contorna, coa renovación dos xardíns Felipe de Castro e do Campo da Feira, as melloras no parque infantil e diferentes intervencións na propia Alameda. O obxectivo é avanzar progresivamente na renovación de todo este eixo de entrada ao centro da vila.
