O Concello de Noia iniciou as obras de renovación da beirarrúa da rúa Galicia, no tramo comprendido entre os números 2 e 12, cun investimento de 48.380,64 euros, IVE incluído. A actuación está financiada integramente a través do Plan Único da Deputación da Coruña e conta cun prazo de execución de tres meses.
Segundo explicou o Concello, a intervención “permitirá renovar unha beirarrúa que presenta deterioro e deficiencias de accesibilidade nun punto especialmente transitado da vila, que funciona como conexión entre a Alameda, o ensanche e o centro histórico”.
Os traballos inclúen a retirada do pavimento existente e a execución dun novo pavimento continuo de pedra granítica, así como a mellora dos alcorques e a incorporación de novos elementos de protección, buscando unha maior integración de todo o espazo.
A obra dá continuidade ás actuacións que o Concello vén desenvolvendo nesta contorna, coa renovación dos xardíns Felipe de Castro e do Campo da Feira, as melloras no parque infantil e diferentes intervencións na propia Alameda. O obxectivo é avanzar progresivamente na renovación de todo este eixo de entrada ao centro da vila.
O alcalde de Noia, Fran Pérez, destacou que “esta non é unha actuación illada. Estamos intervindo progresivamente sobre toda esta contorna para conseguir que un dos principais accesos ao centro de Noia presente unha imaxe máis coidada, accesible e agradable tanto para a veciñanza como para quen nos visita”. O rexedor engadiu que “nos últimos meses actuamos nos xardíns Felipe de Castro, no Campo da Feira e na Alameda, e agora damos continuidade a ese traballo coa rúa Galicia. O obxectivo é que todas estas actuacións vaian conectando entre si e permitan transformar progresivamente o conxunto deste eixo urbano”.
Pola súa banda, o tenente de alcalde e responsable da área de Obras, Manolo Seijas, sinalou que “a rúa Galicia é unha das principais portas de entrada ao casco histórico e levaba tempo precisando unha actuación. Falamos dunha zona moi transitada, con vivendas, comercios e equipamentos, polo que esta obra permitirá mellorar de maneira importante tanto o estado da beirarrúa como a accesibilidade e a comodidade dos percorridos peonís”. Seijas engadiu que “seguimos actuando sobre problemas concretos que afectan ao día a día da veciñanza e, ao mesmo tempo, intentando que cada actuación forme parte dunha mellora máis ampla dos espazos públicos de Noia”.
Modificación temporal do tráfico
A execución das obras obrigará a modificar temporalmente a circulación na contorna. Durante os traballos, o tráfico procedente do semáforo de Dominga será desviado cara á rúa Rosalía de Castro, polo que non se poderá continuar desde ese punto en dirección á rúa Galicia.
O Concello instalará a sinalización provisional necesaria e solicita “precaución e comprensión á veciñanza e ás persoas usuarias da vía polas molestias que se poidan producir durante a execución dos traballos”.
