Co inicio do curso rematou en Noia o programa Concilia Verán 2026, unha edición que, segundo informou o Concello, “bateu récords de participación e que volveu demostrar a importancia de contar cun servizo público que axude ás familias a conciliar durante os meses de verán”. Entre as seis quendas o Concello ofertou 720 prazas, cun horario de 7:30 a 15:30 horas e cunha programación para “converter o Concilia en moito máis que un espazo de conciliación”. De feito, houbo actividades de cultura, deporte, ciencia, xogos, traballos manuais e excursións, visitas a museos e exposicións de Noia, excursións ao Aquapark de Cerceda e ao Space Park de Ribeira, navegacións no balandro Joaquín Vieta e actividades de lecer nos parques e espazos públicos da vila.
Os nenos e nenas tamén participaron nas Festas de San Bartolomeu, colaboraron na decoración dos Xardíns Felipe de Castro para a Noia de Noite e coñeceron de preto o traballo do Grupo de Emerxencias Supramunicipal.
O Concello explicou tamén que “este ano o obxectivo foi conseguir un programa Concilia máis accesíbel e inclusivo, contando con monitorado específico para nenos e nenas con necesidades educativas especiais grazas á colaboración coa entidade local A Misela”.
A concelleira de Conciliación, Ana Blanco, destacou que “estamos moi satisfeitos porque conseguimos un Concilia con máis participación, pero tamén con máis actividades e máis inclusión. Queremos que as familias teñan un servizo de conciliación de calidade e que os nenos e nenas leven para a casa experiencias, aprendizaxes e moitos bos recordos deste verán”.
O Concello agradeceu “especialmente” a todo o equipo de monitorado polo seu traballo, implicación e cariño durante estas semanas, e ao IES Campo de San Alberto pola cesión das instalacións.
Achegáronse 720 prazas, seis quendas e “unha manchea de experiencias”, concluíu o Concello.
