A vítima, que se atopaba nunha zona de difícil acceso, tivo que ser evacuada polo helicóptero Pesca I de Gardacostas.
Unha persoa perdeu a vida este sábado no monte Pindo, no concello coruñés de Carnota, tras sufrir un repentino problema de saúde mentres se atopaba nun punto de complexo tránsito pedestre.
A alerta rexistrouse na Central de Atención a Emerxencias do 112 Galicia arredor das 13:10 horas. A persoa que deu o aviso requiría asistencia sanitaria urxente, indicando que a vítima podía estar a padecer un golpe de calor nun sendeiro estreito e inaccesible para vehículos por terra.
Dada a orografía do terreo, o helicóptero Pesca I tivo que intervir directamente para rescatar e evacuar a persoa afectada. A pesar do despregamento e da rapidez coa que actuaron os equipos de salvamento, os profesionais sanitarios só puideron certificar o seu falecemento.
