O sábado 17 de outubro, Rianxo acollerá unha nova xornada do programa de voluntariado interxeracional Rede Galega de Oficios Vivos, unha iniciativa gratuíta da Xunta de Galicia destinada á recuperación e transmisión dos oficios tradicionais, así como á posta en valor das súas posibilidades de emprego e autoemprego.
A xornada estará dedicada ao oficio tradicional da cerámica e a olería (alfarería), da man da oleira O Rulo. As persoas participantes coñecerán os materiais, ferramentas e procesos propios deste oficio e poderán achegarse de maneira práctica á elaboración artesanal de pezas cerámicas.
A actividade combinará explicacións, demostracións e práctica, favorecendo a aprendizaxe e a transmisión interxeracional dos saberes tradicionais galegos.
A cita será o sábado 17 de outubro no Cuartel Vello (praza Castelao, 218), con horario de 10:00 a 14:00 h e de 16:00 a 20:00 h. A participación será de balde, con prazas limitadas. A xornada vai dirixida principalmente a persoas maiores de 55 anos e a mozas e mozos de 16 a 35 anos, aínda que tamén poderán participar persoas de ata 54 anos. As inscricións compre facelas a través da web Programa de Voluntariado Interxeracional Rede Galega de Oficios Vivos.
