Entre os puntos estratéxicos que destacamos estes días para a contemplación da eclipse deste mércores 12 de agosto figura o Paseo da Ribeira, no porto de Rianxo. Para gozar e conmemorar o fenómeno (que en si mesmo durará escasos minutos, dende as 20.29 horas, pero cuxos efectos prolongaranse durante un par de horas), a Asociación Rianxeira de Empresas (ARE) argallou un programa con diferentes actividades para desfrutar dun serán marcado por un acontecemento astronómico histórico.
A xornada
A Asociación Rianxeira de Empresas (ARE) organiza o vindeiro mércores 12 de agosto, de 19:00 a 22:00 horas, unha gran xornada con motivo da eclipse solar que poderá observarse desde Rianxo. O evento terá lugar no Paseo da Ribeira (Fonte da Rianxeira) e nace co obxectivo de “converter este acontecemento astronómico nunha experiencia para toda a familia, ao tempo que impulsa a actividade do comercio local”, informou a entidade empresarial.
A programación inclúe o reparto de 200 lentes homologadas para a observación segura da eclipse.
Ademais, a xornada contará con música en directo, grazas á colaboración de Cafetería Castelao, un espazo infantil con globoflexia e tatuaxes, unha paella popular, que será vendida polo CD Unión de Asados para a recadación de fondos destinados ao propio club, e un sorteo presencial de 100 euros.
Coincidindo coa celebración do evento, a ARE desenvolverá unha campaña de dinamización comercial nos seus establecementos asociados. As persoas que realicen compras entre o 4 e o 12 de agosto poderán gardar os seus tíckets e presentalos o día do evento no stand da asociación. Cada tícket válido dará dereito a unha rifa para participar nun sorteo presencial de 100 euros, “unha iniciativa que busca incentivar as compras nos días previos ao eclipse e premiar a fidelidade ao comercio de proximidade”, sinalou a ARE.
A organización desta xornada responde á aposta da asociación por “crear campañas innovadoras arredor de acontecementos de gran repercusión social, convertendo un fenómeno astronómico excepcional nunha oportunidade para atraer visitantes, dinamizar o centro urbano e reforzar o papel do comercio local como motor económico e social do municipio”.
A actividade conta coa participación de diferentes entidades locais, facendo posíbel unha programación variada e aberta a todos os públicos, coa intención de que tanto a veciñanza como as persoas visitantes poidan desfrutar dunha tarde diferente nun dos espazos máis emblemáticos de Rianxo.
Información do evento
Data: Mércores, 12 de agosto.
Horario: De 19:00 a 22:00 horas.
Lugar: Paseo da Ribeira (Fonte da Rianxeira).
