O Concello de Rianxo vén de licitar o que sería un dos proxectos máis relevantes da presente lexislatura, “tanto polo investimento que supón como polas súas consecuencias”, segundo explicou o alcalde Julián Bustelo, lembrando que hai uns meses Rianxo resultou ser un dos 68 municipios de toda España adxudicatarios dunha subvención no marco da 2ª convocatoria do programa de axudas para proxectos singulares de renovación das instalacións de alumeado exterior municipal do IDAE dependente do Ministerio para a Transición Ecolóxica e o Reto Demográfico.
A axuda da que resultou beneficiario Rianxo, e que ascende a 547.364,30 euros, permitirá levar a cabo o proxecto de renovación completa do sistema de iluminación da vila de Rianxo. Intervirase en diferentes rúas renovando os sistemas de control e seguimento cunha clara aposta pola dixitalización e renovaranse en torno a 500 luminarias, mudándoas por unhas máis eficientes dotadas de tecnoloxía LED.
“Ademais dunha importante mellora na iluminación da vila, agárdase que coa execución deste importante proxecto se acade un aforro aproximado de 50.000 euros ao ano para as arcas municipais”, engadiu o alcalde.
