O alcalde, José Ramón Romero, e a concelleira de Ensino, Carmen Silva, visitaron na mañá deste 1 de xullo o Campamento Concilia de Verán 2026 do Concello de Boiro que deu comezo este mércores en catro sedes distintas.
Participan este ano un total de 220 nenos e nenas repartidos nos centros de Boiro, Abanqueiro, Cabo e Cespón. O campamento desenvolvese entre o 1 de xullo e o 28 de agosto para rapazada de entre 3 e 12 anos. “Este campamento é un recurso lúdico e de conciliación para as familias durante a época estival que ofrece unha alternativa con horarios adaptados á necesidades de cada familia”, afirmou o alcalde.
Os participantes realizan actividades baseadas en técnicas de intervención participativas e activas con enfoques non sexistas, con actividades planificadas segundo as idades e necesidades socioeducativas. “Durante o verán os nenos e nenas van poder desfrutar de actividades lúdicas e de convivencia contribuíndo á aprendizaxe e ao benestar”, recoñeceu a concelleira Carmen Silva.
