A Plataforma en Defensa da Sanidade Pública da Pobra do Caramiñal fixo público un manifesto no que denuncia a situación que atravesa o centro de saúde da localidade e reclama á Xunta de Galicia medidas urxentes para garantir unha atención sanitaria de calidade.
No documento, o colectivo lembra que a sanidade é un dereito fundamental e subliña o papel esencial da Atención Primaria como porta de entrada ao sistema sanitario, advertindo de que o centro de saúde da Pobra non está a cumprir actualmente esa función debido á falta de profesionais.
Segundo explica a plataforma, das sete prazas de facultativos que tiña asignadas o consultorio, unha quedou vacante tras unha xubilación e nunca foi cuberta. Ademais, aseguran que nos últimos meses tampouco se cubriron de forma completa as seis restantes, chegando a haber períodos nos que só prestaban servizo tres médicos, o que provocou a saturación das consultas e un incremento dos tempos de espera para conseguir cita.
O manifesto tamén denuncia a supresión do servizo de urxencias en horario de tarde no centro de saúde da Pobra, unha situación que obriga á veciñanza a desprazarse ata Ribeira para recibir atención, incrementando a presión asistencial tanto no Punto de Atención Continuada (PAC) como no Hospital da Barbanza.
A plataforma lembra que leva meses mobilizándose para reclamar solucións, con concentracións semanais e a presentación de máis de 3.000 sinaturas ante a Xunta de Galicia. Ademais, sinala que recorreu á Valedora do Pobo, que, segundo indican, continúa á espera dunha resposta por parte da Administración autonómica.
O colectivo considera que a problemática non é exclusiva da Pobra do Caramiñal, senón que afecta a numerosos concellos galegos, e advirte de que a chegada do verán pode agravar a situación polo aumento da poboación en moitas comarcas e pola falta de reforzos previstos para cubrir as vacacións do persoal sanitario.
Por todo iso, a plataforma esixe á Consellería de Sanidade que dote o Centro de Saúde da Pobra do persoal médico que lle corresponde segundo a súa poboación, de maneira estable, para garantir unha atención de calidade. Tamén reclama a recuperación dun servizo de urxencias (PAC) a tempo completo no municipio e a incorporación de reforzos que permitan reducir as demoras nas citas de Atención Primaria.
