O escritor Antón Riveiro Coello foi nomeado este sábado 27 de xuño fillo adoptivo de Boiro nun pleno extraordinario celebrado pola Corporación municipal. A proposta foi aprobada por unanimidade de todos os grupos políticos.
O recoñecemento naceu por iniciativa dos equipos de Dinamización da Lingua Galega do municipio, que destacaron a ampla traxectoria literaria do autor como un dos referentes da narrativa galega contemporánea, o seu compromiso coa lingua galega e coa cultura da comarca do Barbanza, así como a súa contribución á proxección da imaxe de Boiro a través da súa obra, traducida a linguas como o castelán, o portugués, o italiano e o inglés.
Tras a sesión plenaria, a Casa Consistorial acolleu un acto institucional no que o homenaxeado expresou o seu agradecemento polo nomeamento. Durante a súa intervención lembrou a súa vinculación coa vila: “O azar tróuxonos a unha vila como Boiro, onde o mar acabou por formar parte da miña vida e tamén da miña escrita, porque os lugares que amamos acaban escribindo dentro de nós”.
O acto contou tamén coa participación de alumnado dos centros educativos do municipio, que deu lectura a diferentes textos do escritor recollidos nas publicacións Cartafol do Barbanza e A Voz do Lago.
O alcalde de Boiro, José Ramón Romero, pechou o acto destacando o compromiso de Antón Riveiro Coello coa vida cultural e social da localidade. “Un non elixe onde nace, pero si onde bota raíces, e Antón converteuse nun veciño comprometido que participa activamente na vida social e cultural de Boiro e que contribuíu a proxectar o nome do noso municipio”, afirmou.
Coa concesión desta distinción, Antón Riveiro Coello incorpórase á relación de persoas distinguidas polo Concello de Boiro, na que tamén figuran Raimundo García Domínguez, “Borobó”, como fillo adoptivo, e Ramón Martínez López como fillo predilecto.
