O Concello da Pobra do Caramiñal celebrou a aprobación dunha achega de 24.000 euros por parte da Deputación da Coruña para financiar a recuperación e o equipamento da sede da Asociación de Empresarios, Comerciantes e Traballadores Autónomos da Pobra do Caramiñal. O investimento permitirá modernizar as instalacións e mellorar os servizos que a entidade presta ao tecido empresarial do municipio.
A concesión da subvención foi aprobada no pleno provincial celebrado este venres, 26 de xuño, e permitirá sufragar o 80 % dun proxecto cun orzamento total de 30.000 euros. O importe restante será asumido pola propia asociación.
Esta actuación é froito dunha reunión de traballo mantida entre o alcalde da Pobra do Caramiñal, José Carlos Vidal; a concelleira de Relacións Institucionais, Patricia Lojo; e o presidente da Asociación de Empresarios, Comerciantes e Traballadores Autónomos da Pobra do Caramiñal, Fabri Vidal. Durante o encontro trasladouse á Deputación a necesidade de acondicionar a sede da entidade para adaptala ás demandas actuais do comercio e do empresariado local, unha proposta impulsada polo alcalde que resultou decisiva para a aprobación do convenio.
As obras permitirán reparar as humidades existentes, acondicionar e pintar o inmoble e transformar a sala principal nun espazo polivalente mediante a retirada das antigas butacas. Ademais, renovarase o mobiliario e incorporarase novo equipamento para a oficina e a aula de formación.
O proxecto contempla tamén unha importante mellora tecnolóxica coa adquisición de equipos informáticos, un proxector con pantalla para actividades formativas e unha fotocopiadora multifunción en rede, dotando á asociación de ferramentas máis modernas para o desenvolvemento da súa actividade.
O alcalde, José Carlos Vidal, agradeceu o respaldo da Deputación da Coruña e subliñou a importancia desta actuación para fortalecer o tecido económico local. “O comercio de proximidade e o tecido empresarial desempeñan un papel esencial no desenvolvemento económico da Pobra. Dispor dunhas instalacións renovadas e mellor equipadas permitirá á asociación ampliar os servizos que ofrece e seguir impulsando accións en beneficio do comercio e da actividade económica local”, destacou.
