O Concello de Boiro celebrou este xoves día 25 o seu pleno ordinario correspondente ao mes de xuño. A sesión contou cunha totalidade de 16 concelleiros e concelleiras, ao rexistrarse a ausencia dunha concelleira do PP. A sesión, que como de costume pode verse íntegra na canle municipal en Youtube, saldouse con importantes acordos, como a aprobación definitiva do Orzamento cos nove votos a favor do grupo de Goberno (PSOE) e os sete votos en contra da oposición. Como lembraremos, trátase dunhas contas que ascenden a máis de 19 millóns de euros.
Os Orzamentos inclúen entre outras cousas unha partida para pavimentados e arranxo de vías en varios lugares de todo o termo municipal; investimento na mellora da rede de saneamento e abastecemento municipal; unha partida para o arranxo de centros sociais; investimentos en mellora das infraestruturas deportivas; así como mellora de parques infantís entre outras.
Tamén saíu adiante a proposta para solicitar ao ICIO unha bonificación para a construción da residencia da terceira idade no Saltiño. Esta será a primeira residencia para persoas maiores do municipio. Trátase de AGADEA Hábitat: O Saltiño, un proxecto residencial de 39 prazas proxectado nun terreo de titularidade municipal, distribuído en andar baixo, primeiro e segundo andar e, en palabras das dúas entidades impulsoras do proxecto (Concello e AGADEA), “cunha localización privilexiada”.
Votacións da sesión
1. Aprobación da acta da sesión plenaria ordinaria do 28 de maio de 2026 – aprobación con 12 votos a favor (PSOE, BNG e Boiro Novo) e 4 abstencións (PP).
2. Aprobación definitiva do orzamento – aprobación con 9 votos a favor (PSOE) e 7 votos en contra (PP, BNG e Boiro Novo).
3. Modificación de créditos: subvención nominativa AGADEA – aprobación con 9 votos a favor (PSOE) e 3 abstencións (BNG e Boiro Novo). *os 4 concelleiros/as do PP ausentáronse durante a votación do punto.
4. Solicitude de bonificación do ICIO para a construción dunha residencia da 3ª idade no lugar do Saltiño – aprobación con 9 votos a favor (PSOE) e 3 abstencións (BNG e Boiro Novo). *os catro concelleiros/as do PP ausentáronse durante a votación do punto.
