Este luns 22 de xuño rematou na nosa terra a rodaxe de Un deus que non baila, película galega de Pedro Díaz (Ames) sobre as novas formas de familia, o peso da relixión e a procura da liberdade a través de tres mulleres de diferentes xeracións na Galicia rural de finais dos 90. Unha parte importante das secuencias da película rodáronse en enclaves como Outes, Santiago, Brión, Bastavaliños, A Baña, Coristanco, Ames e Negreira. As gravacións iniciáronse o pasado 4 de maio. Agora inicia o seu proceso de postprodución e chegará aos cinemas en 2027.
O filme está protagonizado por María Vázquez (Matria, Os pequenos amores), Ana Santos (Rapa) e Bruna Cusí (Verán 1993). Completan a repartición Irea Chouza, Miguel de Lira, Federico Pérez Rey, Julia Pazo, Mario Beramendi, Elvira Gestoso e Servia Rodríguez.
En palabras do director Pedro Díaz, Un deus que non baila “é unha mirada ao onte máis próximo para entender verdadeiramente quen somos e por que somos hoxe, unha reconstrución das pezas dun espello que nos revela unha imaxe nítida das razóns das nosas familias e de nós mesmos”.
Trátase dunha co-produción hispano-portuguesa producida por Mandrágora Cinema (Pedro Díaz e Marina García), Salon Indien Films (Pablo de la Chica e David Casas Riesco), Matriuska Producciones (Daniel Froiz), Nu Boyana Portugal e Serenade Cinema AIE, en colaboración coas plataformas RTVE e Movistar+ e conta co financiamento do Instituto de la Cinematografía y las Artes (ICAA), a axencia galega AGADIC e a Comunidade de Madrid.
A distribución nacional e internacional correrá a cargo de Sideral, que estreará a película en salas de cinema en 2027.
Sinopse
Galicia, anos 90. María (María Vázquez) quere cumprir o último desexo da súa nai uns meses antes de morrer: que a súa filla, é dicir, a súa neta, faga a primeira comuñón. Unha nova monxa (Bruna Cusí) crúzase no seu camiño ao chegar temporalmente á parroquia do pobo entre moito rumores sobre os motivos que a levaron ata alí.
En Outes
O concello de Outes, concretamente a contorna da Igrexa de San Xoán de Roo, acolleu o pasado 4 de xuño a presentación do filme Un deus que non baila (anteriormente titulado Serenade). Na presentación o director e guionista Pedro Díaz dixo que “nesta longametraxe abórdanse as novas formas de familia, que xa se estaban xerando naquela época da Galicia rural dos 90, e da tradición relixiosa que nos afecta e nos impregna culturalmente”. Ademais, explicou que “agardamos que o filme se poida estrear en 2027, pero dependerá das estreas a nivel nacional”.
Drama familiar luminoso
Un deus que non baila preséntase polos seus creadores como un “drama familiar luminoso”. O director inspírase en vivencias da súa infancia para dirixir e compoñer unha historia que ten, ademais, nas localizacións do Val da Maía a contorna idónea para a súa rodaxe.
As actrices María Vázquez e Bruna Cusí protagonizan unha trama que ten lugar na Galicia rural dos 90, cando María (atea e nai solteira) quere cumprir o derradeiro desexo da súa nai: ver á súa neta Lola (que non vai á igrexa desde o bautismo) facendo a primeira comuñón.
