Preto de corenta mulleres emprendedoras e profesionais participaron o pasado xoves 18 de xuño na II Xornada de encontro e conexión entre mulleres e proxectos, unha iniciativa promovida pola área de Promoción Económica do Concello da Pobra do Caramiñal, dirixida por Amparo Cerecedo, no marco da Rede de Espazos Colaborativos da Deputación da Coruña.
A proposta desenvolveuse entre a praia dos Areos e o Chiringuito Xobre, nun ambiente pensado para favorecer o intercambio de experiencias, o coñecemento mutuo e a xeración de novas oportunidades de colaboración entre proxectos liderados por mulleres.
Durante a xornada, as participantes tomaron parte en distintas dinámicas e espazos de diálogo arredor do emprendemento, o benestar, a creatividade, o turismo e o impacto social no territorio.
A xestora e dinamizadora do Coworking Pobra, Fátima Rodríguez, puxo o foco no valor da cooperación como ferramenta de crecemento, sinalando que “emprender con perspectiva de xénero supón un cambio de paradigma: pasamos de competir a coopetir, entendendo que a colaboración e a xestión emocional son activos tan valiosos para o negocio como a propia estratexia comercial”.
O proxecto contou coa colaboración de Nancy Silva (Apertas de Cores), responsábel do obradoiro emocional; Beatriz Rivas, anfitrioa do encontro; e das coordinadoras das distintas mesas temáticas: Cany Juncal, Beatriz Pereira, Marta Rodríguez e Sonia García, que contribuíron ao desenvolvemento dunha experiencia participativa baseada na inspiración, a reflexión compartida e a creación de vínculos profesionais.
A concelleira Amparo Cerecedo destacou a boa acollida da convocatoria e agradeceu a implicación das asistentes e colaboradoras, subliñando a importancia de seguir impulsando espazos que favorezan o apoio mutuo, a visibilidade do talento feminino e a consolidación de iniciativas emprendedoras no municipio.
