As Rías Baixas e a comarca de Santiago vivirán este sábado unha xornada marcada pola estabilidade atmosférica, baixo a influencia das altas presións situadas nas Illas Británicas. A situación favorecerá un ambiente en xeral agradable, aínda que cunha primeira metade do día condicionada pola presenza de néboas e nubes baixas en diferentes puntos do litoral e do interior.
As brétemas matinais iranse disipando co avance das horas, deixando paso a ceos pouco anubrados ou despexados na maior parte do territorio. Nas Rías Baixas agárdase unha tarde soleada, mentres que na contorna de Santiago poderán aparecer algunhas nubes altas sen maior incidencia.
As temperaturas mínimas manteranse sen cambios significativos respecto dos días anteriores, mentres que as máximas experimentarán un lixeiro ascenso na metade occidental de Galicia, permitindo unha sensación máis agradable durante as horas centrais da xornada.(29 a 32 graos).
En canto ao vento, soprará do norte-nordés con intensidade frouxa en xeral, aínda que acadará intervalos moderados no litoral atlántico, especialmente nas zonas máis expostas das Rías Baixas.
O noso mar; Vento do noroeste á mañá, do noroeste á tarde e do norte á noite, forza 1 a 2 á mañá, 3 a 4 á tarde e 2 a 3 á noite. Mar rizado á mañá, marusía á tarde e mar ovellado á noite. Visibilidade regular á mañá e á noite e boa á tarde. Mar de fondo do oeste á mañá e noroeste á tarde e á noite, con ondas de 0 a 1 metros.
