A Asociación Rianxeira de Empresarios vén de lanzar un comunicado sobre a situación actual da economía local e, tamén, sobre as cousas que se poden facer para evitar o peche de negocios e a perda de postos de traballo. A ARE lembra que nesta delicada situación, non está de máis relembrar o cometido inicial da asociación, cando foi creada en 1988: traballar xuntas e xuntos, as empresas, os autónomos, a veciñanza, o Concello e a ARE, polo desenvolvemento empresarial e económico. Isto vén a conto polo que consideran unha necesidade: crear unha gran plataforma web que visualice a economía rianxeira. Esta é a base do proxecto presentado a semana pasada en colaboración co Concello, o gran escaparate online empresarial rianxeiro, do que falamos en O Barbanza.
“A unión de todas e todos é agora máis necesaria ca nunca pra paliar os negativos efectos provocados pola crise sanitaria da COVID-19”, explica a asociación no comunicado, lembrando que apoiarán “calquera iniciativa destinada a fortalecer e favorecer o desenvolvemento da economía local como por exemplo a web Comercio Rianxeiro creada por Rianxo en Común ou a páxina de Facebook Somos Rianxo, na que se implicaron numerosos negocios rianxeiros, algúns socios da ARE e outros non”.
Segundo engade a asociación, o seu obxectivo é sumar as ditas contribucións, xuntar experiencias e crear, de maneira integral, unha ambiciosa plataforma online na que “todos os negocios rianxeiros poidades estar presentes e na que, a través dun marketplace, aqueles que o desexedes poidades vender os vosos produtos”.
A ARE está a traballar neste ingre no devandito proxecto, xunto co Concello de Rianxo, pero, advirten, é preciso contar con todo o mundo para acadar o mellor dos éxitos posíbeis: “Só coa vosa implicación poderemos realizar este proxecto”, polo que a entidade pide a máxima participación nas xuntanzas que se irán convocando en datas vindeiras.
