O Ateneo de Ribeira (Bar Plaza) vai acoller este sábado 20 de xuño ás 13.00 horas a presentación do libro Los orígenes de Valle-Inclán (Tierra, linaje y leyenda), de Francisco Xavier Charlín Pérez.
O acto, de entrada libre, contará coa presenza do autor, que estará acompañado por José María Paz Gago, presidente da Asociación de Amigos Valle-Inclán, e Ciprián Rivas, presidente do Ateneo de Ribeira.
Durante o acto presentarase tamén o número 51 da revista Cuadrante.
Francisco Xavier Charlín Pérez (Vilanova de Arousa, 1963) é licenciado en Filoloxía pola Universidade de Santiago de Compostela e doutor en Estudos Literarios pola Universidade da Coruña, ademais de profesor no Instituto Eusebio da Guarda da Coruña.
Director da revista Cuadrante, de estudos valleinclanianos e históricos, é coautor do libro El mundo de Valle-Inclán. Viaje a los orígenes (2008) e autor de El Pasajero. Cuaderno de viaje por El Salnés de Valle-Inclán (2016) e Cien almas antigas. Valle-Inclán, historia familiar y ecos literarios (2024).
Tamén publicou numerosos artigos sobre a xeografía literaria valleinclaniana, as orixes familiares do escritor e as relacións da súa vida e obra coa historia e a cultura de Galicia.
