AMIPA, Asociación de nais e pais de persoas con discapacidade intelectual da comarca do Sar, celebrou o pasado venres 5 de xuño no auditorio da Fundación Rosalía de Castro o desfile de moda Camiñar sen límites, unha iniciativa na que participaron once persoas con discapacidade intelectual da comarca.
O acto reuniu familiares, persoas colaboradoras e representantes das entidades que contribuíron á organización dun proxecto que nace coa finalidade de ofrecer un espazo de participación e de visibilidade ás persoas con discapacidade intelectual a través dunha proposta vinculada á moda e á expresión persoal.
A directora-xerente de AMIPA, Begoña Suárez, foi a encargada de conducir o desfile e de presentar a cada unha das persoas participantes, poñendo en valor as súas capacidades, intereses e traxectorias persoais. Sobre a pasarela participaron Suso Romero, Laura Álvarez, Olga Bustelo , Juan Carlos Esparís, Mª Carmen Pan, Inés Varela, Ana María Martínez, Claudio Miguel Morgado, Lucía Esparís, Maruxa López e Teresa Cajaraville, procedentes dos concellos de Padrón, Rois, Dodro.
A primeira parte do desfile estivo dedicada á moda actual, con pezas cedidas polo establecemento Bianco, de Padrón, e complementos elaborados polos talleres de xoiería Sonia Ares e Aurifex. A continuación desenvolveuse un segundo bloque centrado na indumentaria tradicional galega, no que se exhibiron pezas cedidas por De Cotío, pola Asociación de Mulleres Rurais de Urdilde e por particulares que colaboraron na conservación e difusión do patrimonio téxtil galego. Os conxuntos completáronse con xoias artesanais de Sonia Ares e Aurifex e, nalgúns casos, con zocos elaborados pola artesá Elena Ferro.
AMIPA agradeceu tamén a colaboración do modelo profesional padronés Brais Reboredo, que participou na preparación previa das persoas que desfilaron, así como o traballo realizado por Silvia’s Look no peiteado e maquillaxe das e dos participantes.
O desfile concluíu coa saída conxunta das once persoas participantes, que recibiron o recoñecemento do público asistente. Desde a asociación destacan que esta primeira edición de Camiñar sen límites permitiu demostrar que as persoas con discapacidade intelectual poden ocupar espazos dos que tradicionalmente estiveron afastadas e converterse nas protagonistas dunha actividade aberta á participación e ao recoñecemento social.
AMIPA valorará agora a continuidade desta iniciativa e a posibilidade de desenvolver futuras edicións que amplíen a participación e permitan achegar esta experiencia ao conxunto da cidadanía.
