O Concello de Rianxo, a través do seu alcalde Julián Bustelo, emitiu un bando informativo sobre as fogueiras de San Xoán cunha serie de normas e recomendacións de seguridade a ter en conta pola cidadanía. Entre outras cuestións, faise saber que ata o 19 de xuño pódese tramitar a solicitude por declaracións responsábel para realizar unha cacharela na noite de San Xoán (pódense recoller e presentar as declaracións no Rexistro Xeral do Concello de Rianxo).
As normas para a elaboración das fogueiras son as seguintes:
-Só se poderán acender entre as 20:00 horas do día 23 de xuño e a 1:00 horas do día 24 de xuño.
-As fogueiras estarán a unha distancia mínima de 20 metros de vivendas e zonas arboradas. Terán unha altura máxima de 2 metros e un diámetro non superior aos 4 metros.
-Prohíbese empregar pneumáticos, plásticos, latas, botellas, materiais con PVC en xeral e similares, así como botar aerosois, aceites ou líquidos combustíbeis e/ou calquera substancia explosiva.
-As persoas responsábeis deberán contar cuns medios mínimos pero suficientes de extinción para o seu uso inmediato en caso de necesidade.
