O programa Que o ritmo non pare, impulsado polo Centro de Día da Pobra do Caramiñal e desenvolvido coa colaboración do Concello da Pobra do Caramiñal, celebrou a súa xornada de clausura tras varios meses de actividade na Escola Unitaria do Vilariño.
Dirixida a persoas maiores de 60 anos, esta iniciativa promoveu a práctica de exercicio físico a través da música e do baile, fomentando ao mesmo tempo a socialización, o benestar emocional e os hábitos de vida saudábeis.
O programa desenvolveuse entre os meses de outubro de 2025 e xuño de 2026. O Concello da Pobra do Caramiñal, a través da concelleira de Promoción Económica e Servizos Sociais, Amparo Cerecedo, quixo agradecer “a implicación das persoas participantes ao longo destes meses, así como o labor realizado polo persoal do Centro de Día da Pobra do Caramiñal para facer posíbel o desenvolvemento desta actividade”.
Desde o Concello tamén se destacou a boa acollida dunha proposta que permitiu crear un espazo de encontro, convivencia e actividade física, contribuíndo ao envellecemento activo e á mellora da calidade de vida das persoas participantes.
A xornada de clausura serviu para poñer o broche final a unha nova edición desta iniciativa, consolidada como unha actividade de referencia para as persoas maiores do municipio e como un exemplo de colaboración entre administracións en favor do benestar da veciñanza.
