O pleno celebrado en Porto do Son aprobou unha modificación de crédito extraordinario e un suplemento de crédito que se destinarán, por unha banda, ao pago de facturas por importe de 228.880 € e, por outro, a licitar por 71.514 € o proxecto de demolición e posterior reconstrución do edificio Maraxiña, en cumprimento dunha sentenza.
O inmoble atópase na rúa Barranqueira e, no seu día, construíuse sen adecuarse exactamente ao proxecto para o que se concedeu a licenza municipal, de tal modo que se excederon varios centímetros tanto a altura como o retranqueo. No edificio, que conta con permiso de primeira ocupación, residen varias familias. A demolición parcial implicará tirar parte da cuberta, e a fachada que dá á rúa Barranqueira. A comunidade de veciños xa solicitou ante o TSXG a inexecución material da sentenza, ao considerar que é imposible tecnicamente cumprila. O goberno local sinalou, que na actualidade cumpre co PXOM en vigor. Así dáse a circunstancia de que, se levase a cabo o demolición parcial, podería volverse a construír tal e como está agora. O custo estimado da derriba e a posterior reconstrución é de 1,4 millóns. Na sesión acordouse a suspensión da aplicación da ordenanza que regula a instalación de terrazas hostaleiras ata final de ano
