Outes vai acoller estes meses de marzo e abril a segunda edición da Mostra Nicolasa Añón de Teatro Amador, organizada pola asociación Terra de Outes en colaboración co Concello de Outes.
Inclúense seis funcións, a representar na Casa da Cultura de Outes todas as fins de semana.
Os espectáculos (todos eles para todos os públicos) arrincaron o domingo 15 de marzo con E parecía parvo da Asociación Charamela de Melide e proseguiron o 21 de marzo con Mamá!, de Farándula Velutina de Corcubión.
Proseguirán o sábado 28 de marzo con A noiva cadáver do IES de Brión, a partir das 20.00 horas na Casa da Cultura de Outes.
O sábado 4 de abril o público de Outes ten unha cita coa Asociación O Xeito de Esteiro (Muros), que leva á escena Caralavada e Chorisón (Contos de Pepe), ás 18.00 horas.
O domingo 12 será a quenda de Conxoconarte (Conxo, Santiago), que representará Alto no Camiño, ás 19.00 horas.
O ciclo rematará o sábado 18 de abril ás 20.00 horas con A praia do demo, a cargo de Pipións Teatro (ACC Terra de Outes).
