Este sábado 14 de marzo, Rianxo acolleu no Pavillón Municipal José Manuel Abuín “Chema” un seminario intensivo de defensa persoal feminina organizado pola Deputación da Coruña e impartido pola Escuela de Defensa Personal y Policía HKF.
Da man dun experto en seguridade e defensa persoal policial e dunha psicóloga, as mulleres participantes (máis de cincuenta) aprenderon desde como xestionar o medo e actuar ante unha situación de perigo ata técnicas para defenderse ante unha posíbel agresión.
Entregaron os diplomas o alcalde de Rianxo, Julián Bustelo, o deputado provincial Antonio Leira, e a concelleira de Igualdade, Ana Vidal, a cal tamén participou nesta actividade.
A actividade formou parte dun ciclo de seminarios impulsado pola Sección de Deportes da Deputación da Coruña, no marco das actividades programadas para celebrar o 8M, Día Internacional da Muller. As sesións diríxense a mulleres de idades comprendidas entre os 12 e os 75 anos empadroadas en calquera dos concellos da provincia da Coruña. Cada obradoiro durará tres horas, contará cun máximo de 75 participantes e será gratuíto para as asistentes. As sedes desta IV edición son Cariño, Bergondo, Camariñas, Cambre, Padrón, Rianxo, Santiago de Compostela e Narón.
