O Concello de Muros adiantou detalles do seu Programa Concilia Primavera 2026, dirixido a favorecer nas vacacións de Semana Santa a harmonía entre a actividade laboral das nais e pais e o tempo de lecer da rapazada. Segundo fixo saber o Goberno local (as concellerías de Muller e Igualdade e Ensino e Lingua) a axenda inclúe campamentos na EEI de Muros e na EEI de Tal os días 30 e 31 de marzo, 1 e 6 de abril (de 09:00 a 14:00 horas).
Trátase de actividades de lecer para as nenas e nenos nadas/os entre 2014 e 2022 “Potenciar este tipo de actividades é unha prioridade para o noso concello, posibilitando a conciliación familiar e laboral durante as vacacións escolares”, explica Maruxa Martínez, concelleira de Muller e Igualdade. Pola súa banda, a concelleira de Ensino, Laura Rivadeneira, engadiu que estamos ante “unha alternativa de lecer para os nenos e nenas, con actividades lúdicas e dirixidas en Muros e Tal”.
A solicitude de preinscrición poderá facerse dende luns 9 de marzo, ata as 14.00 h do 16 de marzo.
