Este 17 de maio celebrouse a nivel online a significativa coincidencia do Día das Letras Galegas e o Día da Internet, dúas efemérides que este ano deron en entremesturarse dun xeito especial, en boa medida pola imposibilidade de celebrar a nosa cultura de xeito multitudinario e presencial, o que motivou un programa especialmente virtual. Esta virtualidade tamén foi un dos grandes ingredientes das celebracións da Rede de aulas CeMIT que xestionan a axencia AMTEGA e os nosos concellos en 92 termos municipais da nosa terra, incluídos o de Ribeira, Boiro e Porto do Son. A Rede celebrou o Día de Internet cun vídeo protagonizado pola comunidade usuarios, voluntarios e axentes TIC responsábeis das aulas, nos que destacaron as vantaxes de vivir conectados e as posibilidades que abren as canles dixitais para permitir que a vida siga mesmo cando todo se pon en contra.
Foi unha iniciativa da Rede CeMIT xunto co Programa e Voluntariado Dixital (Voldix), impulsados pola Axencia para a Modernización Tecnolóxica de Galicia (AMTEGA). O vídeo colaborativo presentouse baixo o epígrafe CeMIT e Voldix contigo: Conectad@s estámolo conseguindo! e formou parte dun programa xeral de actividades, agrupadas baixo o cancelo #diadeinternet, que se celebrou integramente online, permitindo que calquera cidadán poida participar neles desde a súa casa. O tema das actividades foi destacar o papel da Internet e da tecnoloxía na crise sanitaria.
Actividades das aulas
As aulas da Rede CeMIT sumáronse a diferentes iniciativas para conmemorar o Día de Internet como a colaboración coa Asociación Somos Digital para difundir a oferta de seminarios en liña e webinars con expertos sobre tecnoloxía en tempos de coronavirus durante toda esta semana. Esta actividade buscaba sensibilizar á sociedade galega sobre as posibilidades do uso da Internet así como da redución da fenda dixital e do fomento do uso seguro e responsábel.
Tamén se ofreceu a posibilidade de participar no #RetoScratch para crear un videoxogo e participar na iniciativa Súmate ao Reto ODS dirixido a formadores e educadores co obxectivo de sensibilizar á cidadanía sobre como poden utilizar Internet e os dispositivos tecnolóxicos de forma sustentábel e contribuír así aos Obxectivos de Desenvolvemento Sustentábel (ODS).
