Un total de 91 asociacións de nais e pais (ANPAS) dos centros educativos públicos da provincia da Coruña concorreron á nova convocatoria de axudas posta en marcha pola Deputación para a realización de actividades ao longo do ano 2026, un programa que conta cun orzamento global de 250.000 euros.
A iniciativa ten como obxectivo apoiar o labor das ANPAS como axentes fundamentais da comunidade educativa, fomentando actividades complementarias á educación regrada e impulsando a participación das familias na vida escolar.
As axudas concédense en réxime de concorrencia competitiva e permitirán financiar proxectos de carácter educativo, formativo, cultural e de lecer, así como iniciativas de conciliación da vida familiar e laboral. Tamén se inclúen actividades extraescolares, saídas didácticas, accións de reforzo educativo, encontros formativos e actuacións orientadas á inclusión, á igualdade de oportunidades, ao uso da lingua galega e ao respecto polo medio ambiente.
Cada ANPA poderá recibir unha subvención de entre 1.500 e 10.000 euros, cun coeficiente de financiamento que oscila entre o 20 % e o 80 % do orzamento subvencionable. As actividades deberán desenvolverse ao longo do ano natural 2026.
A deputada de Educación, Yoya Neira, destacou que “esta nova convocatoria reflicte a aposta firme da Deputación da Coruña por unha educación pública de calidade que vai máis alá das aulas, recoñecendo o papel esencial que xogan as ANPAS no acompañamento educativo e na conciliación”.
Neira subliñou tamén a elevada participación rexistrada nesta primeira edición do programa: “O feito de que se presentasen 91 solicitudes demostra a necesidade de seguir apoiando o traballo que realizan as ANPAS nos centros educativos da provincia”.
A deputada puxo en valor, ademais, o enfoque social e inclusivo das bases da convocatoria, salientando que “promove valores fundamentais como a igualdade, a inclusión e a participación comunitaria, que forman parte do modelo educativo que defendemos desde a Deputación da Coruña”.
