Este 11 de novembro o Pazo de San Roque en Santiago acolleu a entrega do V Premio Fina Casalderrey de Literatura Infantil pola Igualdade, un galardón que conta coa colaboración da Secretaría da Lingua e que “pretende incentivar a través dos álbums ilustrados a creación de imaxinarios dirixidos á cativada de maneira que no seu universo non existan desigualdades sexistas”. Así o fixo saber o secretario xeral Valentín García, quen felicitou á premiada deste ano, Ana Rebeca Fernández González (que asina como A.R. do Lobo) pola obra O segredo das Cíes, elixida polo xurado como merecedora deste recoñecemento que, ademais, conta cunha dotación de 2.500€. Na mesma liña, tamén agradeceu a Baía Edicións a organización destas distincións que “contribúen a contar coa publicación de obras de calidade en galego dirixidas a un público moi concreto como é o infantil”.
Neste senso, fixo fincapé “no gran poder que teñen os libros para construír a visión do mundo en idades temperás”, puntualizando que supoñen, ademais, “unha gran ferramenta para potenciar o coñecemento da nosa lingua entre os máis pequenos”.
Do mesmo xeito, quixo ter palabras para Fina Casalderrey, a autora que lle dá nome ao premio, e á súa traxectoria “polo seu compromiso continuo cos tres valores nos que se sustenta este galardón, a literatura infantil e xuvenil, a lingua, e os valores dei igualdade”.
