A senadora nacionalista galega Carme da Silva advirte que Galicia “non pode seguir a asumir recurtes que poñan en risco a viabilidade da súa frota”. Por este feito reclama ao Ministerio de Agricultura, Pesca e Alimentación unha posición firme nas negociacións da UE para garantir a sustentabilidade da frota pesqueira galega.
Carme da Silva ven de rexistrar iniciativas para demandar ao Goberno español unha posición firme na defensa dos intereses da frota galega fronte á nova proposta da Comisión Europea sobre Totais Admisíbeis de Captura (TAC) e cotas pesqueiras para o ano 2026.
A senadora galega advirte que a proposta comunitaria “supón un novo golpe para a frota galega, que leva anos soportando recortes e limitacións que poñen en risco a súa continuidade”. Subliña a senadora nacionalista que “a actividade pesqueira galega é fundamental tanto desde o punto de vista económico como social e precisa dunha defensa decidida por parte do Estado español nas negociacións coa UE”.
A proposta mantén a conxelación da cota de pescada en augas ibéricas e prevé un recurtamento do 26% na cota de abadexo e do 28% na de linguado, especies estas de grande relevancia para as frotas galegas, ademáis dunha redución do 5% na cota de xurelo entre Fisterra e o Golfo de Cádiz. “Estas medidas son nidiamente prexudiciais para os barcos galegos e carecen de xustificación dabondo desde o punto de vista científico e económico”, sinala Carme da Silva.
Ante esta proposta o BNG reclama que o Ministerio defina unha posición nidia e activa nas negociacións co obxectivo de evitar novos recurtes e garantir a viabilidade da frota galega.
A senadora galega aposta por unha defensa da revisión das propostas de redución de cotas que aporte informes científicos e socioeconómicos actualizados “que avalíen o impacto real das medidas na frota galega e negocie un incremento das cotas para as especies máis afectadas con medidas de compensación para as frotas que sufran reducións significativas”.
Insta asimesmo Carme da Silva ao Ministerio a establecer un diàlogo permanente co sector pesqueiro galego, incorporando as súas achegas ás posicións que se defendan ante as institucións comunitárias, de cara a dar pulo a unha revisión da Política Pesqueira Común e adaptala á realidade da pesca galega e garantir o futuro das comunidades mariñeiras.
Conclúe a senadora afirmando que “Galicia non pode seguir asumindo recurtes que ameazan a viabilidade do sector; é preciso un troco no rumbo que priorice a sustentabilidade económica, social e ambiental das nosas frotas”.
