A Consellería do Mar, a través de Portos de Galicia, está a tramitar por procedemento de emerxencia o gasto do remolque do buque que sufriu un incendio no porto de Ribeira o pasado mes de setembro.
A conselleira do Mar, Marta Villaverde, informou hoxe ao Consello da Xunta deste trámite unha vez executado o servizo, debido ao carácter urxente da situación. O custo da operación ascende a 172.000 euros, unha cantidade que será repercutida á aseguradora do barco.
O incendio do buque Awadi tivo lugar no peirao comercial de Ribeira os días 1, 2, 3 e 4 de setembro, xerando un risco importante para as persoas e instalacións portuarias, así como perigo de afundimento e contaminación mariña.
Ante a gravidade do suceso, a Consellería do Mar, mediante Portos de Galicia e o Servizo de Gardacostas, encabezou o operativo de extinción, no que participaron tamén a Capitanía Marítima de Vilagarcía, Salvamento Marítimo, os Bombeiros de Ribeira e Boiro e o Grupo de Emerxencias Municipal de Ribeira.
Entre os medios mobilizados utilizouse un remolcador do servizo portuario de Vilagarcía, o máis próximo á zona afectada, que permitiu empurrar o buque contra o peirao e evitar o seu afundimento.
Segundo os informes técnicos, o servizo prolongouse durante 41 horas de traballo, cun custo total de 172.000 euros. O ente público asumirá inicialmente o pago, que posteriormente será reclamado á aseguradora do navío.
O operativo permitiu evitar danos persoais e minimizar o impacto ambiental, xa que o barco transportaba máis de 20 toneladas de combustible, ademais de amoníaco e pintura, entre outros produtos.
Na actualidade, o buque permanece amarrado no porto de Ribeira á espera dos permisos necesarios para ser remolcado e levado a un estaleiro autorizado.
