O Concello de Boiro quere avanzar na xestión sustentábel e eficiente de refugallos. Con este motivo, o Centro de Formación e Viveiro de Empresas de Espiñeira vai acoller este venres 31 de outubro unha nova xornada práctica sobre compostaxe, separación de residuos e aproveitamento vexetal. A cita dará comezo ás 17.00 horas.
Nesta xornada práctica sobre compostaxe, separación de residuos e aproveitamento vexetal abordaranse catro bloques principais. En primeiro lugar falarase sobre o novo modelo de recollida de residuos, o sistema actual e os cambios que veñen coa separación da materia orgánica; tamén se falará dos hortos urbanos e como estes serven como exemplo de aproveitamento sostíbel.
Levarase a cabo un obradoiro práctico de agricultura ecolóxica e aproveitamento vexetal cunha demostración práctica sobre remedios naturais para combater pragas e técnicas de conservación de produtos vexetais.
A xornada é gratuíta e as prazas son limitadas. A inscrición pode facerse mediante o formulario dispoñible na web municipal ou mediante o enderezo electrónico medioambiente@boiro.org ou o teléfono 981 377 585.
