“Mar por medio ou no medio do mar”. Luís Celeiro

Agardaba que baixara a marea ou que a marea subira. Estaba soa e agardaba que pasara o tempo e
o tempo non se paraba. Era imposible de saber que era o que ocorría aquel día na Mariña, que -por
certo, aínda que sen constancia escrita- limita con Inglaterra, mar por medio. Ou como dicían outros
dos expertos relatores do acontecer, A Mariña de Lugo e a provincia enteira, xunto co resto de
Galicia, está no medio do mar. Si, señor, no medio do mar ou entre mares.
Destas elucubracións, e de outras tales, falouse en Ribadeo, no marco das xornadas “Mar por
medio” que se desenvolveron neste lugar xacobeo por arte e obra da Academia Xacobea, do
Concello de Ribadeo, das universidades de Santiago de Compostela e de Oviedo, de Turismo de
Galicia, do Principado de Asturias e a Deputación Provincial de Lugo. Constituíron un verdadeiro
éxito, pola importancia, o saber e as explicacións dos relatores; pola organización do evento, pola
asistencia cualificada e plenamente entregada á causa do Xacobeo. Por todo.
É obvio que estas xornadas están verdadeiramente consolidadas, para orgullo dos participantes, do
alcalde de Ribadeo, dos membros da corporación municipal, dos traballadores e técnicos do
municipio e de todas as persoas que buscan o desenvolvemento e o progreso da terra e dos homes.
O presidente da Academia, Marcelino Agís, estaba entusiasmado cos logros, con contar os logros e
con facer “o que faga falta”, para lograr que o Camiño de Santiago sega desfrutando do seu enorme
éxito. “É igual que unha ponte -dicía- cruza ríos, une territorios, xeografías, terra e mares.
O Camiño de Santiago permítelles aos observadores contemplar como se achican as discrepancias e
como medra a razón, cando se aplica o coñecemento ao falar, á divulgación e á discusión. Galicia e
os seus arredores están unidos por terra e por mar, por cultura e por lingua, por ineficientes
estradas e moi deficientes vías férreas. Están unidos, eles e mais nós, polo acontecer de cada día,
polo clima e pola xente; pola gastronomía, polo territorio e polos costumes.
Nas Xornadas Mar por medio, todos os ilustres relatores e representacións ao máis alto nivel, falaron
do Camiño de Santiago como patrimonio, como un ben común da humanidade, coa terra e cos
mares. De cada persoa e de cada pobo. Que así sexa!