Do 30 de setembro ao 5 de outubro a provincia da Coruña será escenario da segunda edición das Xornadas Europeas do Patrimonio da Deputación (XEPDAC), que inclúen visitas guiadas, contacontos, música, xogos, astronomía e rutas nocturnas.
A presentación do programa tivo lugar esta mañá na antiga fábrica de Conservas Cerqueira, en Ribeira, coa participación do deputado de Patrimonio, Xosé Penas, e do alcalde do municipio, Luís Pérez Barral.
Este ano, o lema elixido polo Consello de Europa e a Unión Europea é “Patrimonio Arquitectónico: fiestras ao pasado, portas ao futuro”. Segundo destacou Penas, a Deputación únese por segundo ano consecutivo a esta celebración co obxectivo de achegar o patrimonio á cidadanía e poñelo en valor: “Se non coidamos este legado, corremos o risco de perder unha parte de nós mesmos”.
Pola súa banda, o rexedor de Ribeira agradeceu a colaboración da Deputación e puxo en valor o enclave de Cerqueira como símbolo do patrimonio industrial local: “Temos o deber de conservalo e dalle un uso social, e estas xornadas son un primeiro paso importante”.
Programa
As XEPDAC arrancarán con actividades escolares e continuarán durante a fin de semana con propostas abertas ao público e de acceso gratuíto, con inscrición previa.
- Martes 30 setembro – xoves 2 outubro: actividades para escolares en Bergondo, Malpica e Tordoia.
- Venres 3 outubro (Barbanza): visitas á Central Hidroeléctrica do Tambre (Noia), Conservas Cerqueira (Ribeira) e minas de San Finx (Lousame).
- Sábado 4 outubro (Occidente): visitas ao Faro do Cabo Vilán (Camariñas), á Baleeira de Caneliñas (Cee) e ao xacemento romano de Brandomil (Zas). O día pechará cun obradoiro de astrofotografía no monte San Bartolo (Vimianzo).
- Domingo 5 outubro (Interior): visitas ao Batán de Mezonzo (Vilasantar), Castelo de Mesía (Mesía) e Igrexa de Santo Antoniño de Toques (Toques).
A asistencia é gratuíta, pero require inscrición previa a partir do 22 de setembro ás 12:00h a través da web da Deputación: dacoruna.gal/patrimonio/xepdac.
