O alcalde de Padrón, Anxo Arca, e a concelleira de Servizos Sociais, Mariló Saco, visitaron na tarde deste venres 5 de setembro o Centro de Día Iglemen, situado na rúa Pasaxe do Sar, no entorno da praza da Leña. O centro, que abriu as súas portas en 2016, ofrece atención e acompañamento a persoas maiores de 65 anos.
O encontro transcorreu nun ambiente próximo e cheo de diálogo, no que maiores, profesionais e representantes municipais compartiron anécdotas, lembranzas e historias persoais. Os usuarios felicitaron ao alcalde polas últimas melloras realizadas en Padrón, como a limpeza da Fonte do Carme, situada moi preto do centro, e aproveitaron para interesarse pola súa traxectoria persoal e familiar.
Pola súa parte, Anxo Arca e Mariló Saco amosaron interese polas rutinas diarias dos maiores no centro e fixéronlles entrega de varios xogos de mesa, barallas e un bingo, que foron recibidos con moita ilusión.
A xornada rematou cun intercambio moi especial: os usuarios entregaron aos representantes municipais unha carta colectiva con mensaxes elaborados por todos eles e varias caixas de bombóns, que logo compartiron entre todos nun momento cargado de simbolismo e afecto.
O Goberno local destacou “a importancia de manter un contacto directo cos maiores da vila, escoitar as súas necesidades e seguir fortalecendo vínculos que fan comunidade”.
